മഴക്കാല പനികൾ: ഡെങ്കിയും എലിപ്പനിയും തടയാം

ഓരോ മഴക്കാലത്തും കേരളത്തിൽ പനി പടരുന്നു. ഇവയിൽ ഡെങ്കിപ്പനിയും എലിപ്പനിയും (ലെപ്റ്റോസ്പൈറോസിസ്) ജീവനു തന്നെ ഭീഷണിയാകാം. രണ്ടും നല്ലൊരളവിൽ തടയാൻ കഴിയും.

ഡെങ്കിപ്പനി

ഈഡിസ് കൊതുകുകൾ പകൽ സമയത്താണ് കടിക്കുന്നത്. അവ മുട്ടയിടുന്നത് കെട്ടിക്കിടക്കുന്ന ശുദ്ധജലത്തിലാണ്.

• ആഴ്ചയിൽ ഒരു ദിവസം "ഡ്രൈ ഡേ": വീടിനു ചുറ്റും വെള്ളം കെട്ടിനിൽക്കുന്നതെല്ലാം കളയുക
• ചിരട്ട, ടയർ, പൂച്ചട്ടിയുടെ അടിയിലെ പാത്രം, ഫ്രിഡ്ജിന്റെ ട്രേ, ടാർപോളിൻ മടക്കുകൾ
• വെള്ളം ശേഖരിക്കുന്ന പാത്രങ്ങൾ അടച്ചു വയ്ക്കുക

എലിപ്പനി

എലി, കന്നുകാലി തുടങ്ങിയവയുടെ മൂത്രം കലർന്ന വെള്ളത്തിലൂടെയോ മണ്ണിലൂടെയോ, പ്രത്യേകിച്ച് മുറിവുകൾ വഴി, രോഗാണു ശരീരത്തിൽ കടക്കുന്നു.

• പാടത്ത് പണിയെടുക്കുന്നവർ, ഓട വൃത്തിയാക്കുന്നവർ, വെള്ളക്കെട്ടിൽ ഇറങ്ങുന്നവർ: കൈയുറയും ബൂട്ടും ധരിക്കുക
• കാലിലും കൈയിലും മുറിവുള്ളപ്പോൾ മലിനജലത്തിൽ ഇറങ്ങരുത്
• അപകട സാധ്യതയുള്ള ജോലി ചെയ്യുന്നവർ പ്രതിരോധ മരുന്നിനെക്കുറിച്ച് അടുത്തുള്ള ആരോഗ്യ കേന്ദ്രത്തിൽ ചോദിക്കുക

പനി വന്നാൽ

• സ്വയം ചികിത്സ വേണ്ട; ഡോക്ടറെ കാണുക, പ്രത്യേകിച്ച് പനി രണ്ടു ദിവസത്തിൽ കൂടുതൽ നീണ്ടാൽ
• മലിനജലവുമായി സമ്പർക്കമുണ്ടായിട്ടുണ്ടെങ്കിൽ ഡോക്ടറോട് പറയുക
• ഡോക്ടർ നിർദ്ദേശിക്കാതെ വേദനസംഹാരികൾ കഴിക്കരുത്
• ധാരാളം വെള്ളവും കഞ്ഞിവെള്ളവും കുടിക്കുക

ഛർദ്ദി നിൽക്കാതിരിക്കുക, കഠിനമായ വയറുവേദന, മോണയിൽ നിന്നോ മൂക്കിൽ നിന്നോ രക്തം, കണ്ണിൽ മഞ്ഞ നിറം, മൂത്രം കുറയുക: ഇവയിൽ ഏതെങ്കിലുമുണ്ടെങ്കിൽ ഉടൻ ആശുപത്രിയിൽ എത്തുക.