ഒരു ടീസ്പൂൺ ഉപ്പ്: രക്തസമ്മർദ്ദം നിയന്ത്രിക്കാൻ

ഉയർന്ന രക്തസമ്മർദ്ദം (ബിപി) ഹൃദയാഘാതത്തിനും പക്ഷാഘാതത്തിനും വൃക്കരോഗത്തിനും പ്രധാന കാരണമാണ്. പലർക്കും ഇതിന് ഒരു ലക്ഷണവും ഉണ്ടാകില്ല. അതുകൊണ്ട് ഇതിനെ "നിശ്ശബ്ദ കൊലയാളി" എന്നു വിളിക്കുന്നു.

എത്ര ഉപ്പ് ആകാം?

ലോകാരോഗ്യ സംഘടനയുടെ നിർദ്ദേശം മുതിർന്നവർക്ക് ദിവസം 5 ഗ്രാമിൽ താഴെ ഉപ്പ്: ഏകദേശം ഒരു ടീസ്പൂൺ. ഇത് പാചകത്തിലും അച്ചാറിലും പലഹാരങ്ങളിലും എല്ലാം കൂടിയുള്ള ആകെ അളവാണ്.

നമ്മുടെ അടുക്കളയിലെ ഒളിഞ്ഞ ഉപ്പ്

• അച്ചാർ, പപ്പടം, ഉണക്കമീൻ
• ചിപ്സ്, മിക്സ്ചർ, ബേക്കറി പലഹാരങ്ങൾ
• പാക്കറ്റ് സോസുകൾ, ഇൻസ്റ്റന്റ് നൂഡിൽസ്
• ചോറിനു മുകളിൽ "കുറച്ച് ഉപ്പ് കൂടി"

ലളിതമായ മാറ്റങ്ങൾ

• ഊണ് മേശയിൽ നിന്ന് ഉപ്പ് പാത്രം മാറ്റുക
• അച്ചാർ ദിവസവും വേണ്ട; ആഴ്ചയിൽ ഒന്നോ രണ്ടോ തവണ
• രുചിക്ക് നാരങ്ങ, കുരുമുളക്, ഇഞ്ചി, കറിവേപ്പില
• പാക്കറ്റിലെ ലേബലിൽ "sodium" നോക്കി വാങ്ങുക

30 കഴിഞ്ഞാൽ വർഷത്തിലൊരിക്കൽ ബിപി പരിശോധിക്കുക. ബിപിക്ക് മരുന്ന് കഴിക്കുന്നവർ, നല്ലതായി തോന്നിയാലും ഡോക്ടറോട് ചോദിക്കാതെ മരുന്ന് നിർത്തരുത്.